વાંચન સંસ્કૃતિનો વ્યાપ વધારી સાંસ્કૃતિક વિકાસમા યોગદાન આપશે
અંજાર ખાતે ઉચ્ચ અને ટેકનીકલ શિક્ષણ રાજ્ય મંત્રી ત્રિકમભાઈ છાંગાના હસ્તે સરકારી તાલુકા પુસ્તકાલયનું લોકાર્પણ કરવામાં આવ્યું હતું.
આ પ્રસંગે રાજ્યમંત્રી શ્રી છાંગાએ જણાવ્યું હતું કે, શાળા અને કોલેજોની સમીપ જ ગ્રંથાલયરૂપી મંદિરનું નિર્માણ થવાથી વિદ્યાર્થીઓ, યુવાનો અને નાગરિકો માટે વાંચનની ઉત્કૃષ્ટ સુવિધા ઉપલબ્ધ થઈ છે. તેમણે પુસ્તકાલયમાં તમામ વયજૂથના વાચકો માટે ઉપયોગી પુસ્તકો જળવાઈ રહે અને ભવિષ્યમાં આ કેન્દ્ર ‘ઈ-લાઇબ્રેરી’ તરફ આગળ વધે તેવા સકારાત્મક પ્રયાસો પર ભાર મૂક્યો હતો.
તેમણે ઉમેર્યું હતું કે અંજારમાં પણ વાચન સંસ્કૃતિનો વ્યાપ વધશે, જે શહેરના શૈક્ષણિક અને સાંસ્કૃતિક વિકાસમાં મહત્ત્વપૂર્ણ યોગદાન આપશે.
આ પ્રસંગે નગરપતિ ધર્મિષ્ઠાબેન ખાંડેકાએ જણાવ્યું હતું કે, કોલેજની બિલકુલ નજીકમાં જ લાઇબ્રેરીની સુવિધા ઉપલબ્ધ થવાથી વિદ્યાર્થીઓને અભ્યાસ અને જનરલ નોલેજ સંબંધિત પુસ્તકો મેળવવામાં મોટી અનુકૂળતા રહેશે. રાજકોટ વિભાગના મદદનીશ ગ્રંથાલય નિયામક અનિષાબેન સુમરાએ જણાવ્યું હતું કે, “ગ્રંથાલય એ માત્ર એક મકાન નથી, પરંતુ એક જીવંત જ્ઞાનકેન્દ્ર છે. પુસ્તકો જ્યારે વાચકોના હાથમાં પહોંચે છે ત્યારે જ ગ્રંથાલયનું સાચું અસ્તિત્વ સાર્થક થાય છે. નગરપાલિકા ઉપપ્રમુખ પરેશભાઈ માલસત્તર ,
કારોબારી ચેરમેન પ્રકાશભાઈ લોદરીયા, શિક્ષણ સમિતિના ચેરમેન બલરામભાઈ જેઠવા, શાસક પક્ષના નેતા આશિષભાઈ ઉદવાણી, દંડક ગીરીશભાઈ પરમાર , નગરસેવકો સોનલ મહેતા, સંદીપાબેન સોની, ક્રિપાલસિંહ રાણા, આગેવાન હિતેનભાઈ વ્યાસ, ડેનીભાઈ શાહ સહિત નગરપાલિકાના પદાધિકારીઓ, સ્થાનિક અગ્રણીઓ, વિદ્યાર્થીઓ તથા નગરજનો ઉપસ્થિત રહ્યા હતા.
